teri marzi ke ḳhad-o-ḳhal men Dhalta hua main
ḳhaak se aab na ho ja.un pighalta hua main
ai ḳhizan main tujhe ḳhush-rang bana sakta tha
tujh se dekha na gaya phulta-phalta hua main
mujh ko mangi hui izzat nahin puuri aati
TuuT ja.un na ye poshak badalta hua main
shobada-gar nahin mehman-e-saf-e-yaran huun
zahr piita hua aur shahd ugalta hua main
yam-ba-yam ruuh machalti hui machhli ki tarah
dam-ba-dam vaqt ke hathon se phisalta hua main
ab miri raakh uḌa ya mujhe a.ankhon se laga
tujh talak aa gaya huun aag pe chalta hua main
kah rahi hain mujhe vo hausla-afzan ankhen
ruuh tak ja.un ḳhad-o-ḳhal masalta hua main
ho na ho ek hi tasvir ke do pahlu hain
raqs karta hua tu aag men jalta hua main
kar-e-darveshi jaza-yab hai lekin ‘shahid’
ḳhush nahin ḳhalvat-e-ḳhali se bahalta hua main
Leave a Reply