Altaf Hussain Hali
us ke jaate hi ye kya ho ga.i ghar ki surat
na vo divar ki surat hai na dar ki surat
kis se paiman-e-vafa bandh rahi hai bulbul
kal na pahchan sakegi gul-e-tar ki surat
hai gham-e-roz-e-juda.i na nashat-e-shab-e-vasl
ho ga.i aur hi kuchh sham-o-sahar ki surat
apni jebon se rahen saare namazi hushyar
ik buzurg aate hain masjid men ḳhizar ki surat
dekhiye shaiḳh musavvir se khiche ya na khiche
surat aur aap se be-aib bashar ki surat
va.izo atish-e-dozaḳh se jahan ko tum ne
ye Daraya hai ki ḳhud ban ga.e Dar ki surat
kya ḳhabar zahid-e-qane ko ki kya chiiz hai hirs
us ne dekhi hi nahin kisa-e-zar ki surat
main bacha tir-e-havadis se nishana ban kar
aaḌe aa.i miri taslim-e-sipar ki surat
shauq men us ke maza dard men us ke lazzat
naseho us se nahin koi mafar ki surat
hamla apne pe bhi ik bad-e-hazimat hai zarur
rah ga.i hai yahi ik fat.h o zafar ki surat
rahnumaon ke hue jaate hain ausan ḳhata
raah men kuchh nazar aati hai ḳhatar ki surat
yuun to aaya hai tabahi men ye beḌa sau baar
par Darati hai bahut aaj bhanvar ki surat
un ko ‘hali’ bhi bulate hain ghar apne mehman
dekhna aap ki aur aap ke ghar ki surat
Leave a Reply