Aziz Hamid Madni
aaj muqabla hai saḳht mir-e-sipah ke liye
ho ga.e sar ka.i qalam ek kulah ke liye
taza-ruḳhi-e-ka.enat DhunD rahi hai aa.ina
justuju hai hazar men ek gavah ke liye
khul hi gaya tilism-e-dost ain visal men ki thi
ik shab-e-hijr zindagi lazzat-e-ah ke liye
ik shab-e-ḳhud-numa.i men ismat-e-be-maqam ne
kitne saval kar liye ramz-e-gunah ke liye
surat-e-gard-e-karvan hai gham-e-manzil-e-jahan
ḳhvab-e-junun-e-taza-kar chahiye raah ke liye
atish-e-kimiya-garan kaam na aa saki koi
surma hai ḳhak-e-dil miri chashm-e-siyah ke liye
meri ḳhud-agahi bhi ki tere visal ne talab
hijr-e-hazar-shab ke ba.ad ek gunah ke liye
Leave a Reply