Farrukh Adeel
main mutma.in na hua tujh ko gham suna ke bhi
andhera aur baḌha hai diya jala ke bhi
qubul karte hue dil taḌapne lagta hai
ajiib hote hain kuchh faisle ḳhuda ke bhi
vo asman miri dastaras men kya aata
hazar koshishen kiin eḌiyan uTha ke bhi
tujhe gale se laga.en to jaan nikalti hai
asir-e-jism hain lekin tiri haya ke bhi
magar ye kya ki parinde shajar se gir jaa.en
agarche hote hain kuchh fa.ede hava ke bhi
qafas ka qimti panchhi huun so ḳharidte vaqt
mujhe uḌa ke bhi dekha gaya gira ke bhi
nahin hai dasht faqat pyaas ka havala ‘adil’
main ro paḌa huun samundar ko aazma ke bhi
Leave a Reply