ḳhud-ba-ḳhud aankh badal kar ye saval achchha hai
roz kab tak koi puchha kare haal achchha hai
hijr men aish-e-guzishta ka ḳhayal achchha hai
ho jhalak jis men ḳhushi ki vo ma.aal achchha hai
daagh behtar hai vahi ho jo dil-e-ashiq men
jaur hai ariz-e-ḳhuban pe vo ḳhaal achchha hai
dekh un ḳhaak ke putlon ki ada.en zahid
un se kis baat men huron ka jamal achchha hai
kijiye aur bhi shikve ki miTe dil ka ghubar
baton baton men nikal jaa.e malal achchha hai
tandurusti se to behtar thi miri bimari
vo kabhi puchh to lete the ki haal achchha hai
jo nigahon men sama jaa.e vo surat achchhi
jo ḳharidar ko jach jaa.e vo maal achchha hai
charagar ko mire ye bhi nahin tam.iz abhi
kaun sa haal bura kaun sa haal achchha hai
de ḳhuda zar to koi mai-kada abad karen
achchhe kamon men jo ho sarf vo maal achchha hai
hans ke kahte hain kabhi haath se uḌne ka nahin
ta.ir-e-rang-e-hina be-par-o-bal achchha hai
jo na nikle kabhi dil se vo tamanna achchhi
jo na aa.e kabhi lab tak vo saval achchha hai
hasrat aati hai hamen haal par apne kya kya
sunte hain jab kisi bimar ka haal achchha hai
huur ke zikr par a.ina uTha kar dekha
us se iman hai ki mera hi jamal achchha hai
aarzu meri na puuri ho koi baat hai ye
kaash itna vo samajh len ki saval achchha hai
muft milta hai ḳharabat men har mai-kash ko
Tharra piine ke liye jam-e-sifal achchha hai
sainkaḌon barq-jamalon ka guzar hota hai
tur-e-sina se mira bam-e-ḳhayal achchha hai
huun gada-e-dar-e-mai-ḳhana takalluf se bari
TuTa-phuTa ye mera jam-e-sifal achchha hai
haal sunte nahin be-ḳhud hain ye masjid vaale
un se kuchh mai-kade valon hi ka haal achchha hai
daf.atan tark-e-mohabbat men zarar hai ji ka
rafta rafta jo miTe dil se ḳhayal achchha hai
ab ke har shahr men phaila hai jo ta.un ‘hafiz’
marne valon ko ḳhushi hai ki ye saal achchha hai
Leave a Reply