duniya duniya sair safar thi shauq ki raah tamam hui
is basti men sub.h hui thi is basti men shaam hui
kaisi lahar hai sard hava ki saare ThiThure baiThe hain
kal tak to bas ham chup chup the aaj ḳhamoshi aam hui
mausam badle dil ka suraj dukh ki ghaTa men Duub gaya
pyaar ke lail-o-nahar na puchho shaam se pahle shaam hui
dard ki barkha TuuT ke barsi phuuT bahe palkon ke band
is barish men vaz-e-vafa ki har koshish nakam hui
halki si ik lahar thi ab vo tufan ban kar ubhri hai
ik be-nam ḳhalish thi pahle ab vo tera naam hui
tere sar par raat ki raani mahak mahak kar phuul bani
mere sar men phuul ki ḳhushbu shorish ka paigham hui
chhoTa sa vo dil ka TukḌa kya kya faslen deta tha
haif qimar-e-ishq ke karan kaisi zamin nilam hui
pahle to ik saaya ubhra phir saaya tasvir bana
ab vo shakl miri divar pe goya naqsh-e-davam hui
ek amal ke do pahlu avaz-e-salasil jazb ki chup
vo bhi mere naam hui thi ye bhi mere naam hui
ahl-e-hunar ki duniya-talabi shauq-e-shahadat kya karti
ik talvar thi arz-e-hunar ki vo bhi zeb-e-niyam hui
‘baqar’ tum sayyad-zade ho sar ko uTha.e phirna kya
shauq-o-talab ki hujjat-e-aḳhir aḳhir-kar tamam hui
Leave a Reply