tum kahan mujh se mulaqat ko aa sakte ho
chalti gaaḌi se faqat haath hila sakte ho
yuun nahin hai ki har ik ḳhvab ko ta.abir mile
aisa kab hai jise chaho use pa sakte ho
mere jaise ho to hazir hain mire qalb-o-nazar
auron jaise ho to phir shauq se ja sakte ho
lazmi ye bhi kahan hai ki hamare hi raho
daf.atan aur kisi ko bhi to bha sakte ho
asmanon se mire vaste raushan taare
baton baton men sahi toḌ ke la sakte ho
tum ko to vus.at-e-iz.har pe hai itna ubuur
jam ke ik sher agar kah do to chha sakte ho
main zamane men mohabbat ki sada banTti huun
meri avaz men avaz mila sakte ho
Leave a Reply