asman TuuT paḌa hai chhat par
mutma.in huun ki ḳhuda hai chhat par
ye Tapakne ki nahin hai pyare
kasrat-e-zar ki dua hai chhat par
mujh men ab tak hai yahi ḳhauf basa
chiḳh men Duubi sada hai chhat par
ek muflis ne kaha barish se
dekh mera bhi ḳhuda hai chhat par
vaqt niche bhi utarega use
umr bhar kaun rahega chhat par
mahv-e-hairat hai har ik bina.i
koi to khel bapa hai chhat par
raah men aa.e to lagta hai bhala
dekhne men jo bura hai chhat par
chand utra hai mire pahlu men
nuur men Duubi faza hai chhat par
jab se raste pe lagi hain nazren
rasta banta gaya hai chhat par
habs kamre ka batane aaya
mohtaram aaj hua hai chhat par
shauq se dekh rahi hai duniya
husn-e-tasvir bana hai chhat kar
ye bhi ruḳhsat ka ajab lamha hai
shahr ka shahr khaḌa hai chhat par
vaqt raste se uTha laaya hai
dekh ‘shahid’ bhi gaya hai chhat par
Leave a Reply