Lutf Ka Rabt Hai Koi Na Jafa Ka Rishta

Ghulam Rabbani Taban

lutf ka rabt hai koi na jafa ka rishta

dil se kuchh duur hai zalim ki ana ka rishta

dast-e-isa bhi vahi bazu-e-qatil bhi vahi

kitna nazuk hai charaghon se hava ka rishta

jabr-e-halat kaho gham ki mukafat kaho

TuuT bhi jaata hai honTon se nava ka rishta

sochiye to sabhi apne hain koi ghair nahin

hakim-e-shahr se hai jurm-o-saza ka rishta

manzar-e-zist men kuchh rang to bhar deta hai

ḳhar-zaron se kisi abla-pa ka rishta

phuul nayab sahi zaḳhm to nayab nahin

aaj bhi dil se vahi ab-o-hava ka rishta

kya karen rasm-e-zamana ki shikayat ‘taban’

dard se rakhte hain ham log sada ka rishta