na saath aa mire main girte faslon men huun
ghubar-e-dasht huun aur tez andhiyon men huun
na jaane qasd kahan ka hai kyuun nikale qadam
zamana biit gaya kaisi hijraton men huun
ḳhud apne shaam o sahar men ulajh gaya aisa
main asman huun magar apni gardishon men huun
bahut kushada falak hai baḌi basit zamin
magar ye sab main sameTe hue paron men huun
uTha.e phirte hain sar mera ek neze par
buland huun main yahan bhi jo dushmanon men huun
koi bhi hadsa-e-jan ho us ka manzar men
uTha ke dekh lo aḳhbar surḳhiyon men huun
koi sada koi halchal nahin hai bahar ki
main apni guunj men huun apni ahaTon men huun
koi bhi aks nahin jis men mera chehra ho
main a.ina huun magar kitni hairaton men huun
nasha hai niind ka ankhon men TuTta hai badan
ki jaise main bhi lagatar ratjagon men huun
ki jaise mujh ko Duboya gaya hai paani men
ki jaise main koi shatir shanavaron men huun
ki jaise mujh ko chaḌhaya gaya hai suuli par
ki jaise main bhi baḌe unche sar-phiron men huun
ki jaise mujh pe hai chhaya shikar ka aaseb
ki jaise main bhi ḳhatarnak jangalon men huun
ki jaise log mujhe dekhne ko aa.e hain
ki jaise main luTe-hare musafiron men huun
rahun main ḳhud ko sameTe hue sambhale hue
ye ‘ramz’ meri saza hai ki doston men huun
Leave a Reply