Jis Ne Banaya Har Aaina Main Hi Tha

jis ne banāyā har ā.īna maiñ hī thā

aur phir us meñ apnā tamāsha maiñ hī thā

mere qatl kā jashn manāyā duniyā ne

phir duniyā ne dekhā zinda maiñ hī thā

mahl-sarā ke sab chehroñ ko jāntā huuñ

jis se ga.e the dil tak rāsta maiñ hī thā

dekh liyā zindānoñ kī dīvāroñ ne

un se qad meñ buland-o-bālā maiñ hī thā

maiñ hī nahīñ to kaun se log aur kaise log

kaun sī duniyā sāhab-e-duniyā maiñ hī thā

mulkoñ mulkoñ phir kar ḳhālī haath miyāñ

lauTne vaalā vo shahzāda maiñ hī thā

duniyā tū ne ḳhālī haath mujhe jaanā

zālim terā sab sarmāya maiñ hī thā

merā surāġh lagāne vaale jānte haiñ

jab tak thā maiñ apnā havāla maiñ hī thā

Leave a Comment