Razi Akhtar Shauq
jis ne banaya har a.ina main hi tha
aur phir us men apna tamasha main hi tha
mere qatl ka jashn manaya duniya ne
phir duniya ne dekha zinda main hi tha
mahl-sara ke sab chehron ko janta huun
jis se ga.e the dil tak rasta main hi tha
dekh liya zindanon ki divaron ne
un se qad men buland-o-bala main hi tha
main hi nahin to kaun se log aur kaise log
kaun si duniya sahab-e-duniya main hi tha
mulkon mulkon phir kar ḳhali haath miyan
lauTne vaala vo shahzada main hi tha
duniya tu ne ḳhali haath mujhe jaana
zalim tera sab sarmaya main hi tha
mera suragh lagane vaale jante hain
jab tak tha main apna havala main hi tha
Leave a Reply