jab se pahchan men nahin huun main
ghar ke dalan men nahin huun main
haath se chiiz chhuT jaati hai
apne ausan men nahin huun main
phuul kumhla gaya tha phenk diya
apne gul-dan men nahin huun main
ek sajde men ho chuki tahlil
shab ke vijdan men nahin huun main
jism ko kaun ghar men rakhta hai
jism huun jaan men nahin huun main
main ne ḳhud bhi bhula diya ḳhud ko
ab kisi dhyan men nahin huun main
ḳhud hi maqtul ḳhud hi qatil huun
apne tavan men nahin huun main
aarzu se nikal ke dekh mujhe
ahd-o-paiman men nahin huun main
zindagi ab ghaḌi ki Tik-Tik hai
dil ke asthan men nahin huun main
jo zaruri tha vo sambhala hai
apne saman men nahin huun main
mujh ko vahshat qubul kar legi
ab gareban men nahin huun main
zindagi se guzar rahi huun ‘sahar’
kisi tufan men nahin huun main
Leave a Reply