ham agar dasht-e-junun men na ghazal-ḳhvan hote
shahr hote bhi to avaz ke zindan hote
zindagi tere taqaze agar asan hote
kitne abad jazire hain ki viran hote
tu ne dekha hi nahin pyaar se zarron ki taraf
aankh hoti to sitare bhi numayan hote
arzuon se jo paiman-e-vafa ham rakhte
sanehe zaḳhm bhi hote to gulistan hote
ishq hi sho.ala-e-imkan-e-sahar hai varna
ḳhvab ta.abir se pahle hi pareshan hote
mazi-o-dosh ka har daagh hai farda ka charagh
kaash ye sham-o-sahar sirf dil-o-jan hote
zabt-e-tufan ki tabi.at hi ka ik ruḳh hai ‘zamir’
mauj avaz badal leti hai tufan hote
Leave a Reply