mil baithne ye de hai falak ek dam kahan
kya jaane tum kahan ho koi dam ko ham kahan
kuche se tere uth ke bhala jaaen ham kahan
juz naqsh-e-pa hai rahbar-e-mulk-e-adam kahan
daman-kashan phire hai miri khaak se hanuz
rakhta hai aah vo sar-e-marqad qadam kahan
us ke saf-e-mizha se ladave nishan-e-ah
ai fauj-e-ashk jaae hai le kar alam kahan
mera hi lakht-e-dil hai ki ham-rah-e-ashk hai
varna rahe hai aab se atish baham kahan
sab se juda tire khat-e-raihan ki shaan hai
us khat ko likh sake hai zamurrad raqam kahan
munh dekhun jo kare yad-e-qudrat se ham-sari
aisi safai haath ki aur ye qalam kahan
kyun-kar na saqf-e-charkh-e-kuhan tham rahe ‘nasir’
mere sutun-e-ah chhut is men hai tham kahan
Leave a Reply