baḌha jab us ki tavajjoh ka silsila kuchh aur
ḳhushi se phail gaya gham ka da.era kuchh aur
natija dekh ke maana mire masiha ne
kuchh aur dard tha mera hui dava kuchh aur
main apne aap ko kis a.ine men pahchanun
ki ek aks mira kuchh hai dusra kuchh aur
agar kahin koi divar samne aa.i
buland ho gaya paani ka hausla kuchh aur
kuchh aise dekhta hai vo mujhe ki lagta hai
dikha raha hai mujhe mera aa.ina kuchh aur
natija dekhne sunne ke ba.ad ye nikla
bayan-e-vaqi.a kuchh amr-e-vaqi.a kuchh aur
guzar muhal na hota hamara basti men
jo uThtin chhoḌ ke divaren rasta kuchh aur
Leave a Reply