dastan ke ruḳh-numa abvab chori ho ga.e
luT ga.e auqaf sab eraab chori ho ga.e
be-gharaz jaan nazr karne ki rivayat piT chuki
ishq ke darbar ke adab chori ho ga.e
the girah men kuchh natije kuchh adhure tajarbe
illaten gharat huiin asbab chori ho ga.e
bhaap ban kar uḌ ga.e ya ho ga.e gum ret men
band bandhe rah ga.e daryab chori ho ga.e
karni-bharni ik taraf kaisa hisab-o-ehtisab
saare inkar aur sab ijab chori ho ga.e
ham-inan ke zehni izmehlal ka kya puchhna
mere apne ahani a.asab chori ho ga.e
marhala ḳhud-ashna.i ka abhi aaya na tha
naam ‘yasir’ miT ga.e alqab chori ho ga.e
Leave a Reply