shaam dhalte der tak chhat par khadi rahti huun main
dubte suraj ko janan dekhti rahti huun main
kaisi kaisi uljhanon men ab padi rahti huun main
jaane kya kya dekhti aur sochti rahti huun main
koi zer-e-lab hamesha gungunata hai mujhe
main kisi ke dil ki huun aur an-kahi rahti huun main
ek duniya ka safar hai us ke mere darmiyan
fasle hi fasle hain napti rahti huun main
kaisa badal hai lipat jaata hai mujh se khvab men
kaisi barish hai ki shab bhar bhigti rahti huun main
saneha kya tha tamiz-e-farhat-o-gham mit gai
ab koi rut ho hamesha ek si rahti huun main
ik sitara der tak karta hai mujh se guftugu
vo nahin sota so janan jagti rahti huun main