pahle dukh dard kai dil men sambhale main ne
phir kiya khud ko tire gham ke havale main ne
kyuun khule tujh pe safar men thi aziyat kaisi
kab dikhae hain tujhe ruuh ke chhale main ne
tu ne har gaam jo bakhshe hain andhere mujh ko
un andheron men tire khvab ujale main ne
teri tasvir mire paas thi yaani tu tha
din tire hijr ke is khvab men taale main ne
tere gham se kiya duniya ke ghamon ka chara
yaani ik khaar se sab khaar nikale main ne
shahr valon ne inhen abr-e-karam samjha naaz
apne aansu jo havaon men uchhale main ne