Aslam Mahmood
rang saare apne andar raftagan ke hain
ham ki barg-e-ra.egan naḳhl-e-ziyan ke hain
shisha-e-umr-e-ravan se ḳhauf aata hai
aks is men sa.at-e-kam-mehrban ke hain
ham ko kya la-hasili hi ishq men gar hai
ham to ḳhugar yuun bhi kar-e-ra.egan ke hain
tere kuche ki hava puchhe hai ab ham se
naam kya hai kya nasab hai ham kahan ke hain
ham ko kya arz o sama ke sab ḳhazanon se
ham to ashiq ek ism-e-javedan ke hain
mere partav ne tilism-e-tirgi toḌa
aur ab raushan manazir ḳhak-dan ke hain
ham ko kya mauj-e-fana se ḳhauf aa.ega
muntazir ham ḳhud zaval-e-rang-e-jan ke hain
imtihan ye saḳhtiyan ye gardishen ‘aslam’
sab ishare ek chashm-e-mehrban ke hain
Leave a Reply