Koi KHushi Na Koi Ranj Mustaqil Hoga

koī ḳhushī na koī rañj mustaqil hogā

fanā ke rañg se har rañg muttasil hogā

ajab hai ishq ajab-tar haiñ ḳhvāhisheñ is kī

kabhī kabhī to bichhaḌne talak ko dil hogā

badan meñ ho to gila kyā tamāsh-bīnī kā

yahāñ to roz tamāshā-o-āb-o-gil hogā

abhī to aur bhī chehre tumheñ pukāreñge

abhī vo aur bhī chehroñ meñ muntaqil hogā

ziyāñ mazīd hai asbāb DhūñDhte rahnā

huā hai jo vo na hone pe mushtamil hogā

tamām-rāt bhaTaktā phirā hai saḌkoñ par

huī hai sub.h abhī shahr muzmahil hogā

Leave a Comment