Bedam Shah Warsi

Ye Saqi Ki Karamat Hai Ki Faiz-e-Mai-Parasti Hai

ye saaqi ki karamat hai ki faiz-e-mai-parasti hai

ghata ke bhes men mai-khane par rahmat barasti hai

ye jo kuchh dekhte hain ham fareb-e-khvab-e-hasti hai

takhayyul ke karishme hain bulandi hai na pasti hai

vahan hain ham jahan ‘bedam’ na virana na basti hai

na pabandi na azadi na hushyari na masti hai

tiri nazron pe chadhna aur tire dil se utar jaana

mohabbat men bulandi jis ko kahte hain vo pasti hai

vahi ham the kabhi jo raat din phulon men tulte the

vahi ham hain ki turbat chaar phulon ko tarasti hai

karishme hain ki naqqash-e-azal nairangiyan teri

jahan men mail-e-rang-e-fana har naqsh-e-hasti hai

ise bhi navak-e-janan tu apne saath leta ja

ki meri aarzu dil se nikalne ko tarasti hai

har ik zarre men hai inni-inallah ki sada saaqi

ajab mai-kash the jin ki khaak men bhi josh-e-masti hai

khuda rakkhe dil-e-pur-soz teri shoala-afshani

ki tu vo shama hai jo raunaq-e-darbar-e-hasti hai

mire dil ke siva tu ne bhi dekhi bekasi meri

ki abadi na ho jis men koi aisi bhi basti hai

hijabat-e-taayyun mane-e-didar samjha tha

jo dekha to naqab-e-ru-e-janan meri hasti hai

ajab duniya-e-hairat alam-e-gor-e-ghariban hai

ki virane ka virana hai aur basti ki basti hai

kahin hai abd ki dhun aur kahin shor-e-anal-haq hai

kahin ikhfa-e-masti hai kahin iz.har-e-masti hai

banaya rashk-e-mehr-o-mah tiri zarra-navazi ne

nahin to kya hai ‘bedam’ aur kya ‘bedam’ ki hasti hai

More Poems

Leave a Comment