kis ko mehrban kahiye kaun mehrban apna
vaqt ki ye baten hain vaqt ab kahan apna
ab jahan men baaqi hai aah se nishan apna
uḌ ga.e dhuen apne rah gaya dhuan apna
ai ḳhuda gila sun le apni be-niyazi ka
aaj haal kahta hai ek be-zaban apna
so ke raat kaaTi hai be-kasi ke pahlu men
chandni ne dekha hai mere ghar saman apna
ghar to ab bhi duniya ke dhuup hi men bante hain
kyuun uTha nahin leta saaya asman apna
ham safar ke qisse ko ḳhatm kar ke chalte hain
rasta badalti hai apni dastan apna
na-murad duniya men rah ke ḳhuub bhar paa.e
chal nikal chalen ai dil kuchh nahin yahan apna
jante hue ‘natiq’ ham-vatan ki halat ko
DhunDte phiren ja kar kis liye makan apna
Leave a Reply