Poet
havas ka rang chaḌha us pe aur utar bhi gaya
vo ḳhud hi jam.a hua aur ḳhud bikhar bhi gaya
thi zindagi miri rahon ke pech-o-ḳham ki asiir
magar main raat ke hamrah apne ghar bhi gaya
main dushmanon men bhi ghir kar niDar raha lekin
ḳhud apne jazba-e-haivaniyat se Dar bhi gaya
mire lahu ki talab ne mujhe tabah kiya
havas men sang ki hathon se mere sar bhi gaya
hai lafz-o-ma.ani ka rishta zaval-amada
ḳhayal paida hua bhi na tha ki mar bhi gaya
sila ye manzil-e-maqsud ka mila ‘shadab’
safar tamam hua aur ham-safar bhi gaya
Leave a Reply