jazba-e-dil ko amal men kabhi laao to sahi
apni manzil ki taraf paanv baḌhao to sahi
zindagi vo jo harif-e-gham-e-ayyam rahe
dil shikasta hai to kya saaz uThao to sahi
jaag uTThegi ye soi hui duniya lekin
pahle ḳhvabida tamanna ko jagao to sahi
phuul hi phuul hain kahte ho jinhen tum kanTe
meri duniya-e-junun men kabhi aao to sahi
tumhen abad nazar aa.egi ujḌi duniya
dil ki duniya ko mohabbat se basao to sahi
zindagi phir se javan phir se hasin ho jaa.e
un ki ankhon se zara aankh milao to sahi
karte phirte ho andhere ki shikayat ‘darshan’
dil ki duniya men koi diip jalao to sahi
Leave a Reply