Farooq Bakshi
mashvara kis ne diya tha ki masiha.i kar
zaḳhm khane hain to logon se shanasa.i kar
jeb ḳhali hai to kya dil se dua.en denge
ham se durveshon ki nadan pazira.i kar
phir nazar aa.egi asan ye duniya tujh ko
aankh se dekh magar dil ko tamasha.i kar
ghar men mumkin hai magar dil men na divar uTha
faisla soch-samajh kar ye mere bhaa.i kar
duudh ka duudh bhi aur paani ka paani hoga
ru-ba-ru baiTh ke baten kabhi harja.i kar
kaun deta hai yahan dad-e-suḳhan ab ‘faruq’
kyuun jalata hai lahu qafiya-paima.i kar
Leave a Reply