hal-e-dil main ne jo duniya ko sunana chaha
mujh ko har shaḳhs ne dil apna dikhana chaha
apni tasvir banane ke liye duniya men
main ne har rang pe ik rang chaḌhana chaha
ḳhak-e-dil jauhar-e-a.ina ke kaam aa hi ga.i
laakh duniya ne nigahon se girana chaha
sho.ala-e-barq se gulshan ko bachane ke liye
main ne har aag ko siine men chhupana chaha
apne aibon ko chhupane ke liye duniya men
main ne har shaḳhs pe ilzam lagana chaha
ghairat-e-mauj use phenk ga.i sahil par
Dubne vaale ne jab shor machana chaha
Leave a Reply