Raees Warsi
ḳhud-agahi ka ajab rog lag gaya hai mujhe
ki apni zaat pe dhoka tira hua hai mujhe
pukarti hai havaon ki naghmagi tujh ko
sukut jhiil ka avaz de raha hai mujhe
ajiib zauq-e-mohabbat ata kiya tu ne
vajud-e-sang bhi tahzib-e-a.ina hai mujhe
main apne naam se na-ashna sahi lekin
tumhare naam se har shaḳhs janta hai mujhe
main apne ghar ke diye bhi bhula.e baiTha huun
tire ḳhayal ne ye hausla diya hai mujhe
kahan ye fursat-e-kavish ki tujh ko yaad karun
shu.ur-e-zat ka darpesh marhala hai mujhe
‘ra.is’ sher ki duniya se kya gharaz mujh ko
kisi ki yaad ne sha.ir bana diya hai mujhe
Leave a Reply