Mushaf Iqbal Tausifi
ḳhvab huun main to miri zaat se pahle kya tha
abhi jaaga huun to is raat se pahle kya tha
apne hone ka ab ehsas hua hai kuchh kuchh
tujh se is tishna mulaqat se pahle kya tha
main agar chup huun ye bahta hua dariya kya hai
lab-kusha huun to miri baat se pahle kya tha
gardish-e-sham-o-sahar ik nigah-e-mahr tiri
tere is lutf-o-inayat se pahle kya tha
ḳhushbuen kis ki hain ye rang bhare hain kis ne
mere in ḳhaak ke zarrat se pahle kya tha
tujh se kya puchh rahe the ye mah o mahr o nujum
main na tha mere savalat se pahle kya tha
Leave a Reply