Poet
ajab ahval dekha is zamane ke amiron ka
na un ko Dar ḳhuda ka aur na un ko ḳhauf piron ka
misal-e-mahr-o-mah din raat khate charḳh phirte hain
falak ke haath se ye haal hai raushan-zamiron ka
qafas men phenk ham ko phir vahin sayyad jaata hai
ḳhuda hafiz hai gulshan men hamare ham-safiron ka
mujhe shikva nahin be-rahm kuchh tere taghaful se
khule-bandon phire tu haal kya jaane asiron ka
dil-e-yaqut hai tujh la.al-e-lab ke rashk se pur-ḳhun
tire dandan ke aage ghaT gaya hai mol hiron ka
kiya hai us nishan-andaz ne tarkash tahi mujh par
miri chhati sira ho jis upar toda hai tiron ka
hamen divan-ḳhane se kisi mun.im ke kya ‘hatim’
hai azadon ke gar rahne ko bas takiya faqiron ka
Leave a Reply