Jagat Mohan Lal Ravan
sab ko guman bhi ki main agah-e-raz tha
kis darja kamyab fareb-e-majaz tha
misl-e-mah-e-do-hafta vahi sarfaraz tha
jis ki jabin-e-shauq pe dagh-e-niyaz tha
puchho na hal-e-kashmakash-e-yas-o-arzu
vo bhi ajiib marhala-e-jan-gudaz tha
jab tak haqiqaton se mira dil tha be-ḳhabar
bechara mubtala-e-gham-e-imtiyaz tha
jhonka hava-e-sarv ka rindon ke vaste
ḳhum-ḳhana-e-bahar se hukm-e-javaz tha
ahl-e-jahan ke kufr o tavahhum ka kya ilaaj
a.ina kah raha hai ki a.ina-saz tha
muzmir the meri zaat men asrar-e-ka.enat
main aap raaz aap hi ḳhud sharah-e-raz tha
aa.en pasand kya use duniya ki rahaten
jo lazzat-ashna-e-sitam-ha-e-naz tha
ḳhilqat samajh rahi thi jise iztirab-e-dil
pinhan usi men hasti-e-ashiq ka raaz tha
achchha hua hamesha ko chup ho gaya ‘ravan’
ik ik nafas gharib ka hasti-gudaz tha
Leave a Reply