hamare saath ḳhuda ho ki ham ḳhuda ke saath
magar rahe yahi vabastagi dua ke saath
kashid karte hue rahat-e-vajud-o-adam
diye ke saath rahunga na main hava ke saath
na.e gulab karenge mukalima kis se
nikal paḌunga chaman se agar saba ke saath
chhalak na jaa.e kahin saghar-e-mata-e-hosh
rahunga aaj kisi dard-ashna ke saath
fishar-e-zabt se rukne lagi hai saans miri
muqabla hai kisi sabr-azma ke saath
pasand hain mujhe multan ke dar-o-divar
nigar-ḳhana-e-istaḳhar-o-nainva ke saath
usi charagh se nisbat rakhun abhi ‘sajid’
ki dil laga.un kisi aur dil-ruba ke saath
Leave a Reply