kitne dil TuuTe hain duniya ka ḳhabar hone tak
kitne sar phuTe hain divar men dar hone tak
ek kanTa jo nikalta hai to sau chubhte hain
amn tha hausla-e-fikr-o-nazar hone tak
ham ne apne se bhi sau baar mohabbat ki hai
haan magar dil men kisi shoḳh ka ghar hone tak
ab kahin raqs-e-junun hai to kahin naghma-e-ḳhun
kitni suuni thi faza zer-o-zabar hone tak
aaj sunta huun vahi naqsh-e-qadam chumte hain
jo bahut ḳhush the mire shahr-badar hone tak
ankhon ankhon men bhi kaT jaa.e to ham raazi hain
ye andhere hai bas ik raat basar hone tak
jab jhulas dega zamana to na ummid na yaas
shaḳh ko ḳhauf hai be-barg-o-samar hone tak
is qayamat ka jo puchho to koi naam nahin
ham pe jo biit ga.i tum ko ḳhabar hone tak
ik kiran phuTegi ik shoḳh hava sankegi
isi ummid men jaage hain sahar hone tak
aur ik nara-e-mastana ki mahfil jaage
aur ik jaam zamane ko ḳhabar hone tak
un ke honTon pe vo ma.asum tabassum ki shaguft
sho.la-e-narm bani lams-e-nazar hone tak
meri barbadi bhi ik hashr hai lekin ‘zaidi’
irtiqa raqs men hai hashr-e-digar hone tak
Leave a Reply