Raees Niyazi
sab ko vahshat hai miri vahshat ke saman dekh kar
chak-daman dekh kar chak-e-gareban dekh kar
be-ḳhabar kanTon se tha ahl-e-mohabbat ka shu.ur
paanv rakhne the zamin-e-ku-e-janan dekh kar
allah allah jazba-e-ulfat ki mo.ajiz-kariyan
vo pareshan ho ga.e mujh ko pareshan dekh kar
yaad aaya phir mujhe afsana-e-tur-o-kalim
ik tajalli si tire aariz pe raqsan dekh kar
charagar ab mujh se meri lazzat-e-iza na puchh
ḳhanda-zan hote hain zaḳhm-e-dil namakdan dekh kar
hai mohabbat ka agar donon taraf yaksan asar
vo pareshan kyuun nahin mujh ko pareshan dekh kar
is men muzmar hain bahut naghme hayat-e-ishq ke
chheḌ mizrab-e-junun saz-e-rag-e-jan dekh kar
is junun ka charagar ab aur hi kuchh kar ilaaj
aur vahshat baḌh chali hai kunj-e-zindan dekh kar
va nahin hota lab-e-shikva sar-e-mahshar ‘ra.is’
apne sar par ḳhanjar-e-qatil ka ehsan dekh kar
Leave a Reply