Behzad Lakhnavi
fariyad hai ab lab par jab ashk-fishani thi
ye aur kahani hai vo aur kahani thi
ab dil men raha kya hai juz hasrat-o-nakami
vo niish kahan baaqi ḳhud jis ki nishani thi
jab dard sa tha dil men ab dard hi ḳhud dil hai
haan ab jo haqiqat hai pahle ye kahani thi
pur-ab si rahti thiin pahle ye miri ankhen
haan haan isi dariya men ashkon ki ravani thi
ai chashm haqiqat men duniya ko ye samjha de
baaqi bhi vahi nikli jo chiiz ki faani thi
bulbul ne to afsana apna hi sunaya tha
gulshan ki kahani to phulon ki zabani thi
yuun ashk baha.e the yuun kiin na thiin fariyaden
ik baat chhupani thi ik baat batani thi
saada nazar aata hai ab to varaq-e-daman
ab tak mire daman par ankhon ki nishani thi
‘bahzad’ ka vo aalam bhi ḳhuub hi aalam tha
‘bahzad’ ki nazron men har chiiz javani thi
Leave a Reply