raat ankhon men kaTne vaalo shaad raho abad raho
bar-e-hijr uThane vaalo shaad raho abad raho
kachchi umr men kal ke dukhon se aaj ulajhna Thiik nahin
pahla savan bhigne vaalo shaad raho abad raho
ab aa.e ho saare diye jab ik ik kar ke bujh bhi ga.e
lekin lauT ke aane vaalo shaad raho abad raho
ḳhana-badoshi ek hunar hai rafta rafta aa.ega
ranj-e-masafat khinchne vaalo shaad raho abad raho
ek dariche se do ankhen roz sada.en deti hain
raat ga.e ghar lauTne vaalo shaad raho abad raho
hijr-zadon par ḳhud nahin khulta kis aalam men rahte hain
haal hamara puchhne vaalo shaad raho abad raho
Leave a Reply