ye kyon kahun ki unhen hal-e-dil suna na saka
nazar men tha vo fasana jo lab tak aa na saka
mujhe kabhi ḳhalish-e-dil ka lutf aa na saka
nazar uThi bhi to un se nazar mila na saka
gunahgar-e-mohabbat ko sab ne baḳhsh diya
ki ye gunah kisi ki samajh men aa na saka
mire ḳhayal men taḳhliq-e-dil ka raaz ye hai
ki ishq vus.at-e-kaunain men sama na saka
tiri talash men nikla hai dekhte kya ho
vo bad-nasib jo apna suragh pa na saka
vahi nazar hai vahi dil vahi tamanna.en
jahan-e-ishq ko ḳhud ishq bhi miTa na saka
vahi fasana-e-dil hai vahi hikayat-e-shauq
jise vo sun na sake aur main suna na saka
baḌi kashish hai tire sang-e-dar men mere liye
sar-e-niyaz uThaya to dil uTha na saka
ye dil hai aur ye jan-e-hazin qusur muaaf
tiri nazar ka taqaza samajh men aa na saka
mujhe to hashr tak us ki najat men shak hai
gunah-e-ishq jise aadmi bana na saka
ye ishq hai ki junun iztirab hai ki sukun
main dil ko bhuul gaya dil tujhe bhula na saka
yaqin tha shab-e-va.ada zarur aaoge tum
sahar tak ek sitara bhi jhilmila na saka
tira karam ki mujhe soz-e-zindagi baḳhsha
miri ḳhata ki use zindagi bana na saka
fareb-e-ishq ne ankhen si khol diin ‘shahid’
main us ke ba.ad kisi ka fareb kha na saka
Leave a Reply