Rafat Shameem
TuuT kar alam-e-ajza men bikharte hi rahe
naqsh-e-ta.amir jahan ban ke bigaḌte hi rahe
apne hi vahm-o-tazabzub the ḳharabi ka sabab
ghar aqidon ke basa.e to ujaḌte hi rahe
jaane kya baat hui mausam-e-gul men ab ke
pankh panchhi ke fazaon men bikharte hi rahe
chand yadon ki panah-gah men jaane kyuun ham
saya-e-sham ki manind simaTte hi rahe
ham ne har rang se chehre ko sajaya lekin
apni pahchan ke asar bigaḌte hi rahe
Leave a Reply