mumkin na thi jo baat vahi baat ho ga.i
dariya mujhe mila to miri pyaas kho ga.i
jab tak tumhara zikr raha jagti rahi
phir vo hasin raat bhi mahfil men so ga.i
saaya tumhari yaad ka ab mere saath hai
duniya to ik nadi thi samundar men kho ga.i
tera ḳhayal aaya to mahsus ye hua
ḳhushbu tire badan ki mire saath ho ga.i
shayad ye raat aap se milne ki raat hai
ḳhush-rang chandni dar-o-divar dho ga.i
tere hasin ḳhayal ki ḳhushbu faza men thi
barish gulab-jal ki hamen bhi bhigo ga.i
‘asrar’ un ke gham ne bhi raushan kiye charagh
palkon men ik ḳhushi bhi sitare piro ga.i
Leave a Reply