Ghayas Anjum
ḳhasare men rahe lekin na chhoḌi sadgi ham ne
ba-har-surat nibha.i dushmanon se dosti ham ne
salaf the jo hamare misl-e-ḳhurshid-o-mah-o-anjum
unhi ke raste pe chal ke paa.i raushni ham ne
adab ke da.ere ko de di vus.at saare aalam ki
ki us ki abiyari ki bara.e zindagi ham ne
jahan vaalo na maano tum magar sach hai ki duniya men
baḌhaya hai tah-e-ḳhanjar vaqar-e-ashiqi ham ne
yahan sach bolne par zahr ka pyala hi milta hai
ajab rasm-e-sitam dekhi hai tere shahr ki ham ne
vasa.el jab ki saare ho chuke the be-asar ‘anjum’
charagh-e-dil jala kar duur ki hai tirgi ham ne
Leave a Reply