Anand Narayan Mulla
jo shab-e-siyah se Dar ga.e kisi shaam hi men bhaTak ga.e
vahi tajdar-e-sahar bane jo siyahiyon men chamak ga.e
na banaya munh kisi jaam par na lagaya dil kisi jaam se
jo labon tak aa.e vo pi liye jo chhalak ga.e vo chhalak ga.e
hai hayat-e-jehd nafas nafas rah-e-ashiyan hai qafas qafas
jo na nok-e-ḳhar pe chal sake rah-e-zindagi se bhaTak ga.e
tujhe kuchh ḳhabar bhi hai mohtasib isi bazm men tire samne
laḌen duur hi se nigahen kabhi yuun bhi jaam khanak ga.e
mire rahnuma-e-suḳhan-sara kabhi mimbaron se utar zara
koi gaam rah-e-amal men bhi tiri guftugu se to thak ga.e
hain na jaane kitne gul-e-hasin jo chhupa.e ariz-e-atishin
liye apna saghar-e-ambarin kisi dasht hi men mahak ga.e
kahun kya main ziist ki dastan use yuun samajh mire mehrban
kabhi harf-e-bazm jo sun liya to nazar ke jaam chhalak ga.e
rah-e-ilm shak ki hain siḌhiyan yahi zehn zinda ka hai nishan
jise iḳhtilaf men ho guman vo hamin na hon jo bahak ga.e
na nazar mili na zaban khuli chhupi phir bhi dil ki na bekali
kabhi duur ja ke palaT paḌe kabhi paas ja ke ThiThuk ga.e
chali bad-e-jabr agar to kya mujhe yuun jahan na bujha saka
mujhe raas aa.i yahi hua mira sho.ale aur bhaḌak ga.e
mire zehn-o-dil ki basiraten gham-e-zindagi ki haqiqaten
mire lab pe giit nahin hain vo ki jo payalon men chhanak ga.e
sunen bam-o-hosh pe ja ke kyuun tiri ‘mulla’ ayat-e-be-maza
abhi koi ishq men raat ko vo ghazal suni ki phaḌak ga.e
Leave a Reply