apne chehre par bhi chup ki raakh mal ja.enge ham
ab tiri manind socha hai badal ja.enge ham
aag jo ham ne jala.i hai tahaffuz ke liye
us ke sho.alon ki lapaT men ghar ke jal ja.enge ham
ḳhatm hai ahd-e-zamistan dhuup men hiddat si hai
ek anjane safar par ab nikal ja.enge ham
zindagi apni asasi ya qayasi jo bhi ho
ḳhvab ban kar aa.e manind-e-ghazal ja.enge ham
mustaqil ik ruup kab tak is tarah dhare phiren
vaqt ke sayyal paimane men Dhal ja.enge ham
tu agar be-mantiqi par dil ki hansta hai to kya
dil jidhar le jaa.e qassam-e-azal ja.enge ham
chandni men saare dukh tahlil karne ke liye
ghar hai apna aaj ya ‘shahin’ kal ja.enge ham
Leave a Reply