Naseem Sahar
suraj ke ham-safar hain hamari umang ye
aur samne hamare hai kaali surang ye
meri tarah ye dil ke lahu men naha.e hain
be-vaj.h to nahin hai gulabon ka rang ye
is ma.arke men kaam jo ham aa ga.e to kya
jaari rahegi ba.ad hamare bhi jang ye
ik lams mil gaya tha mujhe tere dhyan ka
ab umr-bhar utarne nahin dunga rang ye
sharminda huun na dost muzir is liye huun main
aate hain dushmanon ki taraf hi se sang ye
aa.i hui giraft men hai gard-bad ki
ab jangalon men ja ke giregi patang ye
ra.ana.iyan ajiib si hain yad-e-yar men
ḳhushbu ye ḳhushbuon men hai rangon men rang ye
Leave a Reply