bhuul sakta hai unhen koi bhi aise kaise
raftagan dil men basa karte hain kaise kaise
jaan le kar bhi agar ḳhush nahin hone vaala
koi batla.e vo phir manega vaise kaise
hanste hanste vo juda.i ko bhi sah ja.ega
zinda rah pa.enge lekin mire jaise kaise
vo to anmol hai nayab hai iklauta hai
us ki tashbih karen ham kisi shai se kaise
ye mire yaar ki ankhon men raha karti thi
puchhiye kuchh na hui dosti mai se kaise
zindagi ye tiri raftar ajab tarz ki hai
chalna chahen to chalen ham tiri lai se kaise
zindagi se tujhe be-daḳhl to kar den janan
par tu nikle bhi to nikle rag-o-pai se kaise
kis tarah koi bhula de tujhe dekho to ‘vasi’
mashvare ham ko mila karte hain kaise kaise
Leave a Reply