hisar-e-qarya-e-ḳhunbar se nikalte hue
ye dil malul tha azar se nikalte hue
baḌi hi der talak dhuup mujh ko chhu na saki
tumhare saya-e-divar se nikalte hue
ki phir se taḳht ko aana tha mere qadmon men
main pur-yaqin tha darbar se nikalte hue
shua-e-nur ke phuTe se jaan larazti thi
tumhari garmi-e-ruḳhsar se nikalte hue
tumhare dhyan men gum ho ga.i thi mahki hava
hudud-e-jada-e-gulzar se nikalte hue
main lauT aaya tujhe chhoḌ kar magar aadha
vahin raha dar-o-divar se nikalte hue
faza men der talak ḳhuub jagmagate ‘shumar’
vo lafz shoḳhi-e-guftar se nikalte hue
Leave a Reply