nae dhab ka kuchh josh-e-sauda hua hai
khuda jaane ab ke mujhe kya hua hai
taalluq un ankhon se paida hua hai
bahut din ka ye khvab dekha hua hai
na aalam men tujh sa na mujh sa jahan men
na aisa hua hai na vaisa hua hai
na le qais aage mire nam-e-vahshat
abhi kal ki hai baat paida hua hai
phir uthta hai dud-e-mohabbat jigar se
vahi haal agla sa mera hua hai
ye ghar-bar hai dida-e-ashk-za se
mira daman aghosh-e-dariya hua hai
vo vadi-e-aiman pe mauquf kya hai
hamara har ik dasht dekha hua hai
zara dam to lene de ai chashm-e-jadu
badi muddaton men dil achchha hua hai
kaha main ne tanhai hai baat sun lo
kaha hans ke tum ko to sauda hua hai
taraqqi pe hai naujavani tumhari
abhi kya hua hai abhi kya hua hai
hijab-e-nazar se khule bhed dil ke
abas ham se zahir men parda hua hai
hamari tumhari to hain dil ki baten
na maano agar us ka charcha hua hai
na ghabrao jaana aji ham bhi samjhe
kahin aur bhi aaj vaada hua hai
na manenge ham aaj to le chalenge
bahut rose imroz farda hua hai
agar tum bhi dekho to rone lagoge
miri jaan ye haal apna hua hai
‘nasim’ ab kahan qadr-dan-e-sukhan hain
kahe sher ye bhi jo charcha hua hai
Leave a Reply