Tashna Azmi
yahi to mas.ala Thahra ki ab-o-gil nahin milte
yahan bas haath milte hain ki dil se dil nahin milte
takalluf bartaraf rakh kar jo tanha.i men milte hain
ḳhuda jaane vo kyuun aḳhir sar-e-mahfil nahin milte
salamat hain ḳhuda ke fazl se ham aisi duniya men
jahan lashen to milti hain magar qatil nahin milte
jahan ke zarre zarre se sada-e-adl aati thi
usi insaf ke mandir men ab aadil nahin milte
ham aisi kashti-e-be-badbani ke musafir hain
jise tufan to milte hain magar sahil nahin milte
chaḌha rakha hai ghaza jab se apne apne chehron par
nazar aate hain ahl-e-haq sabhi batil nahin milte
ai ‘tashna’ na-ummidi kufr hai so justuju kar len
agarche ahmaqon ke shahar men aaqil nahin milte
Leave a Reply