sar-e-taslim mira ḳham nahin hone deta
vo mira rab mujhe barham nahin hone deta
ghaib se aaj bhi karta hai hifazat meri
sar nigun vo mira parcham nahin hone deta
jab bhi milta hai mujhe zaḳhm naya deta hai
vo mulaqat ko marham nahin hone deta
sher kahne ka vo andaz mila hai mujh ko
josh-e-mahfil mujhe maddham nahin hone deta
ab to darbar men bhi zikr hamara hai ‘suhaib’
kya ajab shaḳhs hai sar ḳham nahin hone deta
Leave a Reply