sar-e-taslīm mirā ḳham nahīñ hone detā
vo mirā rab mujhe barham nahīñ hone detā
ġhaib se aaj bhī kartā hai hifāzat merī
sar nigūñ vo mirā parcham nahīñ hone detā
jab bhī miltā hai mujhe zaḳhm nayā detā hai
vo mulāqāt ko marham nahīñ hone detā
sher kahne kā vo andāz milā hai mujh ko
josh-e-mahfil mujhe maddham nahīñ hone detā
ab to darbār meñ bhī zikr hamārā hai ‘suhaib’
kyā ajab shaḳhs hai sar ḳham nahīñ hone detā