dil vaale hain ham rasm-e-vafa ham se mili hai
duniya men mohabbat ko baqa ham se mili hai
vo ḳhanda-ba-lab zikr-e-gulistan pe ye bole
ghunchon ko tabassum ki ada ham se mili hai
sadiyon se taraste hue kanon men jo pahunchi
tariḳh se puchho vo sada ham se mili hai
ham vo hain ki ḳhud phunk diye apne nasheman
gulshan ke andheron ko ziya ham se mili hai
kya ek hi mehvar pe hai Thahri hui duniya
vo jab bhi mili hai to ḳhafa ham se mili hai
vo but jo ḳhuda aaj bane baiThe hain un ko
ye shan-e-ḳhuda.i ba-ḳhuda ham se mili hai
ham Thahre hain tufan-e-havadis ke muqabil
baḌh baḌh ke gale mauj-e-bala ham se mili hai
sikha hai jalane ka chalan sham.a ne tum se
parvanon ko jalne ki ada ham se mili hai
ham ahl-e-mohabbat hain lahu dete hain ‘rahi’
be-nur charaghon ko ziya ham se mili hai
Leave a Reply