Jafar Raza
buri baat un ko hamari lage
hamen un ki har baat pyari lage
na.e tarz ki un ki yaari lage
karen aisi baten kaTari lage
ye jharne ye laala ye sabza ye gul
chaman men har ik shai tumhari lage
ye maj.hul si dosti kya karen
hamen dushmani dil se pyari lage
kali sa badan hai ki mauj-e-bahar
vo sar se qadam tak kunvari lage
ye dil ki amanat banen to sahi
jo tir-e-sitam baari baari lage
dilon men jo utre to lahra.e barq
nigah-e-karam sehar-kari lage
kisi ḳhun-e-nahaq ki gul-reziyan
chaman-dar-chaman lala-kari lage
ghazal aisi kah di hai jafar-‘raza’
raqiban ke dil par kaTari lage
Leave a Reply