hanso to rang huun chehre ka rovo to chashm-e-nam men huun
tum mujh ko mahsus karo to har mausam men huun
chaha tha jise vo mil bhi gaya par khvab bhare hain ankhon men
ai mere lahu ki lahar bata ab kaun se main aalam men huun
log mohabbat karne vaale dekhenge tasvir apni
ek shua-e-avara huun aina-e-shabnam men huun
us lamhe to gardish-e-khun ne meri ye mahsus kiya
jaise sar pe zamin uthae ik raqs-e-paiham men huun
yaar mira zanjiren pahne aaya hai bazaron men
main ki tamasha dekhne vaale logon ke matam men huun
jo likkhe vo khvab mire ab ankhon ankhon zinda hain
jo ab tak nahin likh paaya main un khvabon ke gham men huun